ភ្នំពេញ៖ ក្រសួងប្រៃសណីយ៍និងទូរគមនាគមន៍ (ក.ប.ទ.) បានសម្រេចទុកពេល១០ខែដល់ក្រុមហ៊ុនទូរស័ព្ទទាំងអស់ពង្រឹងសេវាទូរស័ព្ទរបស់ខ្លួនដោយសំដៅបង្កើនគុណភាពសេវាទូរសព្ទចល័តនិងអ៊ីនធឺណិត និងលើកកម្ពស់ការការពារសិទ្ធិរបស់អ្នកប្រើប្រាស់។

ក្នុងសេចក្ដីប្រកាសព័ត៌មានចុះថ្ងៃពុធ ទី២០ ខែកក្កដា ក្រសួងទូរគមនាគមន៍បានលើកឡើងថាគុណភាពសេវាទូរគមនាគមន៍បច្ចុប្បន្ននៅមានកម្រិតនៅឡើយ ហើយក្នុងរយៈពេល១ឆ្នាំមកហើយដែលក្រសួងបានធ្វើការជាមួយក្រុមបច្ចេកទេសដើម្បីរៀបចំសេចក្តីព្រាង "ប្រកាសស្តីពីគុណភាពសេវាទូរគមនាគមន៍” ក្នុងការកំណត់ បទដ្ឋានបច្ចេកទេសជាក់លាក់ដែលត្រូវអនុវត្តជាកាតព្វកិច្ចសម្រាប់ប្រតិបត្តិករទូរគមនាគមន៍ សំដៅពង្រឹងគុណភាព សេវានិងបណ្តាញទូរគមនាគមន៍របស់ខ្លួន ក៏ដូចជាដើម្បីចូលរួមការពារនិងធានាផលប្រយោជន៍របស់អ្នកប្រើប្រាស់ ក្នុងការទទួលបានសេវាទូរគមនាគមន៍ប្រកបដោយគុណភាពស្របតាមទឹកប្រាក់ដែលបានបង់។

នៅថ្ងៃទី១៩ ខែកក្កដា ក្រសួងបានដាក់ប្រកាសស្តីពីគុណភាពសេវាទូរគមនាគមន៍ឱ្យអនុវត្តន៍ និងបានទុកពេល១០ខែឱ្យក្រុមហ៊ុនទូរស័ព្ទទាំងអស់ពង្រឹងគុណភាពសេវារបស់ខ្លួន។

ក្នុងសេចក្ដីប្រកាសនោះបានលើកឡើងថា៖ «ក្រោយពី “ប្រកាសស្តីពីគុណភាពសេវាទូរគមនាគមន៍” ត្រូវបានចុះហត្ថលេខា ប្រតិបត្តិករទូរគមនាគមន៍មាន រយៈពេល ១០ (ដប់) ខែ ដើម្បីកែលំអនិងពង្រឹងគុណភាពសេវាទូរគមនាគមន៍របស់ខ្លួន ដោយអនុលោមតាមសូចនាករ គុណផលគន្លឹះដូចមានចែងក្នុងប្រកាសនេះ។ ក្នុងករណីប្រតិបត្តិករទូរគមនាគមន៍ណាមិនអនុវត្តតាមស្តង់ដារអប្បបរមា ដែលបានកំណត់ក្នុងប្រកាស់នេះទេ ប្រតិបត្តិករទូរគមនាគមន៍នោះនឹងត្រូវទទួលរងពិន័យ»។

ក្នុងសេចក្ដីប្រកាសស្ដីពីគុណភាពទូរគមនាគមន៍ដែលក្រសួងទូរគមនាគមន៍បានចេញកាលពីថ្ងៃទី១៩ ខែកក្កដា មាន៨ជំពូក និង២០ប្រការ ដែលមានគោលបំណងធានាថាព័ត៌មានដែលផ្ដល់ដោយក្រុមហ៊ុនមានភាពត្រឹមត្រូវ អាចទទួលយកបាន និងអាចប្រៀបធៀបាន ផ្ដល់ជម្រើសទាំងតម្លៃនិងគុណភាពដល់អ្នកប្រើប្រាស់ ការពារផលប្រយោជន៍អ្នកប្រើប្រាស់ ពង្រឹងគុណភាពសេវានិងបណ្ដាញ និងធានាពីភាពត្រឹមត្រូវនៃការវាស់ស្ទង់លើគុណភាពសេវារបស់ក្រុមហ៊ុនទូរគមនាគមន៍៕